chheDa hi kyon hawa-e-rah-e-ku-e-yar ne

chheḌā hī kyoñ havā-e-rah-e-kū-e-yār ne

andher kar diyā mirī musht-e-ġhubār ne

ik aḳhgar-e-jamāl farozāñ ba-shakl-e-dil

pheñkā idhar bhī husn-e-tajalli-nisār ne

afsurdagī bhī husn hai tābindagī bhī husn

ham ko ḳhizāñ ne tum ko sañvārā bahār ne

is dil ko shauq-e-dīd meñ taḌpā ke kar diyā

kyā ustuvār va.ada-e-nā-ustuvār ne

jalve kī bhiik de ke vo haTne lage the ḳhud

dāman pakaḌ liyā nigah-e-e'tibār ne

gesū ġhubār-e-rāh-e-tamannā se aT na jaa.eñ

sahrā meñ aap nikle haiñ ham ko pukārne

mujh ko chunā hai bahr-e-sitam-hā-e-iltifāt

chashm-e-jafā-shi.ār-o-vafā-e.atibār ne

baḳhshī haiñ is ḳhudī ko pa-e-imtihān-e-zarf

parvardigāriyāñ mire parvardigār ne

kab se kiyā hai bāñdh ke ehrām-e-be-ḳhudī

merā tavāf gardish-e-lail-o-nahār ne

himmat pe merī pyaar se umDā hai qalb-e-bahr

dho.e haiñ paañv girya-e-abr-e-bahār ne

sahn-e-majāz meñ ba-hazārāñ-hazār naaz

khelī hai mujh se āñkh-michaulī bahār ne

dī hai nazar ko dāvat-e-bos-o-mas-o-kanār

kaliyoñ ke husn-e-pāk-e-gunah-intizār ne

chandeñ hazār ālam-e-āshuftagī ba-dosh

utrā hai naaz ḳhud mire gesū sañvārne

is jām-e-dil ko apnī hathelī pe le ke ḳhud

chhalkā diyā hai sāqī-e-kausar-nisār ne

rashk-e-duī se vus.at-e-āġhosh kar ke tang

bhīñchā hai mujh ko vahdat-e-kasrat-shikār ne

jalvoñ ne raqs-e-nāz kiyā hai mire huzūr

parde uThā uThā diye haiñ parda-dār ne

āġhosh-e-chūn-o-chand se jhuñjhlā ke ek baar

chhīnā mujhe hameshgī-e-be-kanār ne

maiñ kāfir-e-majāz-parast-e-haq-āshnā

samjhā kahāñ kahāñ se sadā dī hai yaar ne

dīvāna-vār kufr ko īmāñ kiye hue

dauḌā to saath chhoḌ diyā e.atibār ne

chheDa hi kyon hawa-e-rah-e-ku-e-yar ne

andher kar diya meri musht-e-ghubar ne

ek aKHgar-e-jamal farozan ba-shakl-e-dil

phenka idhar bhi husn-e-tajalli-nisar ne

afsurdagi bhi husn hai tabindagi bhi husn

hum ko KHizan ne tum ko sanwara bahaar ne

is dil ko shauq-e-did mein taDpa ke kar diya

kya ustuwar wada-e-na-ustuwar ne

jalwe ki bhik de ke wo haTne lage the KHud

daman pakaD liya nigah-e-e'tibar ne

gesu ghubar-e-rah-e-tamanna se aT na jaen

sahra mein aap nikle hain hum ko pukarne

mujh ko chuna hai bahr-e-sitam-ha-e-iltifat

chashm-e-jafa-shiar-o-wafa-eatibar ne

baKHshi hain is KHudi ko pa-e-imtihan-e-zarf

parwardigariyan mere parwardigar ne

kab se kiya hai bandh ke ehram-e-be-KHudi

mera tawaf gardish-e-lail-o-nahaar ne

himmat pe meri pyar se umDa hai qalb-e-bahr

dhoe hain panw girya-e-abr-e-bahaar ne

sahn-e-majaz mein ba-hazaran-hazar naz

kheli hai mujh se aankh-michauli bahaar ne

di hai nazar ko dawat-e-bos-o-mas-o-kanar

kaliyon ke husn-e-pak-e-gunah-intizar ne

chanden hazar aalam-e-ashuftagi ba-dosh

utra hai naz KHud mere gesu sanwarne

is jam-e-dil ko apni hatheli pe le ke KHud

chhalka diya hai saqi-e-kausar-nisar ne

rashk-e-dui se wusat-e-aghosh kar ke tang

bhincha hai mujh ko wahdat-e-kasrat-shikar ne

jalwon ne raqs-e-naz kiya hai mere huzur

parde uTha uTha diye hain parda-dar ne

aaghosh-e-chun-o-chand se jhunjhla ke ek bar

chhina mujhe hameshgi-e-be-kanar ne

main kafir-e-majaz-parast-e-haq-ashna

samjha kahan kahan se sada di hai yar ne

diwana-war kufr ko iman kiye hue

dauDa to sath chhoD diya eatibar ne