chhoD de ai dil mohabbat ka KHayal achchha nahin

chhoḌ de ai dil mohabbat kā ḳhayāl achchhā nahīñ

kaam achchhā hai magar is kā ma.aal achchhā nahīñ

un se jo kahnā hai ai dil kah samajh kar soch kar

ye bhī kuchh kahne meñ kahnā hai ki haal achchhā nahīñ

ai dil-e-barbād ab ham se gila be-sūd hai

ham to kahte the mohabbat kā ma.aal achchhā nahīñ

hañs rahā huuñ is liye apne dil-e-barbād par

ek mohsin kī ināyat par malāl achchhā nahīñ

duur duur un se rahe ham ḳhud ġhurūr-e-ishq meñ

kaun ab un se kahe jā kar ki haal achchhā nahīñ

dil kī ḳhātir hī kiyā thā tark-e-ulfat kā ḳhayāl

dil hī ab kahtā hai mujh se ye ḳhayāl achchhā nahīñ

abr bhī merī tarah rotā hī rahtā hai mudām

us ke bhī tāle.a meñ shāyad koī saal achchhā nahīñ

hai talab tujh ko to phir husn-e-talab se kaam le

lab pe aa jaa.e agar harf-e-savāl achchhā nahīñ

kyā kahūñ 'sāhir' ki ab kaisā zamāna aa gayā

dushmanī kyā dostī kā bhī ma.aal achchhā nahīñ

chhoD de ai dil mohabbat ka KHayal achchha nahin

kaam achchha hai magar is ka maal achchha nahin

un se jo kahna hai ai dil kah samajh kar soch kar

ye bhi kuchh kahne mein kahna hai ki haal achchha nahin

ai dil-e-barbaad ab hum se gila be-sud hai

hum to kahte the mohabbat ka maal achchha nahin

hans raha hun is liye apne dil-e-barbaad par

ek mohsin ki inayat par malal achchha nahin

dur dur un se rahe hum KHud ghurur-e-ishq mein

kaun ab un se kahe ja kar ki haal achchha nahin

dil ki KHatir hi kiya tha tark-e-ulfat ka KHayal

dil hi ab kahta hai mujh se ye KHayal achchha nahin

abr bhi meri tarah rota hi rahta hai mudam

us ke bhi talea mein shayad koi sal achchha nahin

hai talab tujh ko to phir husn-e-talab se kaam le

lab pe aa jae agar harf-e-sawal achchha nahin

kya kahun 'sahir' ki ab kaisa zamana aa gaya

dushmani kya dosti ka bhi maal achchha nahin