chhoD de karb-e-ana mauja-e-pur-KHam banna

chhoḌ de karb-e-anā mauja-e-pur-ḳham banñā

zindagī siikh ga.ī gesū-e-barham banñā

kyā koī aur tasarruf na thā us kā mumkin

kaisī miTTī ke muqaddar meñ thā aadam banñā

haañ ḳhamīr ek hī darkār hai donoñ ke liye

chashm-e-jānāñ ho ki paimāna-e-zamzam banñā

mudda.ī marham-e-har-zaḳhm ke hone vaale

aa gayā raas tujhe kyā ġham-e-ālam banñā

har sañvartī huī taqdīr hai māthe pe shikan

har ubhartī huī tasvīr ko mub.ham banñā

aur bhī dahke raho dahke raho dahke raho

aa hī jā.egā kabhī phuul pe shabnam banñā

kyoñ mujhe yaad dilātā hai azal ke din kī

merī sūrat kā tire zehn meñ kam-kam banñā

har tabassum rahā marhūn-e-fuġhāñ kā 'hairat'

har masarrat ko paḌā bār-gah-e-ġham banñā

chhoD de karb-e-ana mauja-e-pur-KHam banna

zindagi sikh gai gesu-e-barham banna

kya koi aur tasarruf na tha us ka mumkin

kaisi miTTi ke muqaddar mein tha aadam banna

han KHamir ek hi darkar hai donon ke liye

chashm-e-jaanan ho ki paimana-e-zamzam banna

muddai marham-e-har-zaKHm ke hone wale

aa gaya ras tujhe kya gham-e-alam banna

har sanwarti hui taqdir hai mathe pe shikan

har ubharti hui taswir ko mubham banna

aur bhi dahke raho dahke raho dahke raho

aa hi jaega kabhi phul pe shabnam banna

kyon mujhe yaad dilata hai azal ke din ki

meri surat ka tere zehn mein kam-kam banna

har tabassum raha marhun-e-fughan ka 'hairat'

har masarrat ko paDa bar-gah-e-gham banna