chhoD kar bar-e-sada wo be-sada ho jaega

chhoḌ kar bār-e-sadā vo be-sadā ho jā.egā

vahm thā merā ki patthar ā.īna ho jā.egā

maiñ baḌā ma.asūm thā mujh ko ḳhabar bilkul na thī

mere chhū lete hī vo merā ḳhudā ho jā.egā

dā.era-dar-dā.era hai sabz jañgal surḳh aag

kab havā jaage ye manzar kab havā ho jā.egā

be-muravvat rāstoñ se be-ḳhabar shāyad hai vo

phir kahīñ par merā us kā sāmnā ho jā.egā

saat rañgoñ kī jabīñ par vo likhegā apnā naam

jab vo apne rañg kā aks āshnā ho jā.egā

āftāb us raaz se nā-āshnā shāyad nahīñ

qaid-e-mehvar se kisī din ye rihā ho jā.egā

haath meñ le kar qalam 'manzūr' ye sochā nahīñ

kārobār-e-lafz meñ kyā fā.eda ho jā.egā

chhoD kar bar-e-sada wo be-sada ho jaega

wahm tha mera ki patthar aaina ho jaega

main baDa masum tha mujh ko KHabar bilkul na thi

mere chhu lete hi wo mera KHuda ho jaega

daera-dar-daera hai sabz jangal surKH aag

kab hawa jage ye manzar kab hawa ho jaega

be-murawwat raston se be-KHabar shayad hai wo

phir kahin par mera us ka samna ho jaega

sat rangon ki jabin par wo likhega apna nam

jab wo apne rang ka aks aashna ho jaega

aaftab us raaz se na-ashna shayad nahin

qaid-e-mehwar se kisi din ye riha ho jaega

hath mein le kar qalam 'manzur' ye socha nahin

karobar-e-lafz mein kya faeda ho jaega