chhoD kar jannat jidhar bhi hazrat-e-adam gae

chhoḌ kar jannat jidhar bhī hazrat-e-ādam ga.e

saath saath un ke hazāroñ kārvān-e-ġham ga.e

rafta-rafta jab mirī āñkhoñ par aañsū jam ga.e

yuuñ lagā jaise musāfir manziloñ par tham ga.e

be-sabātī par tū jin ke raat bhar giryāñ rahī

phuul kab ke vo chaman se dekh ai shabnam ga.e

mai-kada vīrān sāġhar sar-nigūñ saaqī udaas

zindagī se ab surūr-o-kaif ke 'ālam ga.e

agle vaqtoñ kī kahāñ ab rah ga.iiñ bāteñ huzūr

husn kī sāda-mizājī 'ishq ke dam-ḳham ga.e

anjuman kī anjuman tasvīr ban kar rah ga.ī

is adā se aaj un kī anjuman meñ ham ga.e

rah ga.ī ab chilchilātī dhuup nafrat kī 'kañval'

chāñdnī rāteñ ga.iiñ vo pyaar ke mausam ga.e

chhoD kar jannat jidhar bhi hazrat-e-adam gae

sath sath un ke hazaron karwan-e-gham gae

rafta-rafta jab meri aankhon par aansu jam gae

yun laga jaise musafir manzilon par tham gae

be-sabaati par tu jin ke raat bhar giryan rahi

phul kab ke wo chaman se dekh ai shabnam gae

mai-kada viran saghar sar-nigun saqi udas

zindagi se ab surur-o-kaif ke 'alam gae

agle waqton ki kahan ab rah gain baaten huzur

husn ki sada-mizaji 'ishq ke dam-KHam gae

anjuman ki anjuman taswir ban kar rah gai

is ada se aaj un ki anjuman mein hum gae

rah gai ab chilchilati dhup nafrat ki 'kanwal'

chandni raaten gain wo pyar ke mausam gae