chhoD kar un ko hamara aasra koi nahin

chhoḌ kar un ko hamārā aasrā koī nahīñ

mā-sivā un ke sahārā dūsrā koī nahīñ

mamba.a-e-asrār ishq-e-kibriyā koī nahīñ

un se baḌh kar ā.ina-dar-ā.ina koī nahīñ

dar pe pahra hai lagī haiñ qaiñchiyāñ dīvār par

ho bhalā dīdār kaise rāsta koī nahīñ

jhāñk kar khiḌkī se ḳhud parda girā dete haiñ vo

jab ki is manzar se manzar ḳhushnumā koī nahīñ

māh-ruḳh kī zulf se aise banā pur-nūr chāñd

ishq kī duniyā meñ is jaisī ziyā koī nahīñ

gum huā rahtā huuñ un kī yaad meñ har aan maiñ

is se baḌh kar aur ehsās-e-vafā koī nahīñ

merī ḳhvāhish hai sadā phūlo-phalo jān-e-bahār

dil kī dhaḌkan se bhī aage kī duā koī nahīñ

dekhiye maġhrib se niklā hai hamārā āftāb

ham ko hairat ye huī hairat-zada koī nahīñ

merī mayyat qabr tak dushman ke kāñdhe par ga.ī

kā.enāt-e-ishq se aayā gayā koī nahīñ

qabr kī āġhosh meñ jā kar 'falak zāhir huā

monis-o-hamdam amal ke mā-sivā koī nahīñ

chhoD kar un ko hamara aasra koi nahin

ma-siwa un ke sahaara dusra koi nahin

mamba-e-asrar ishq-e-kibriya koi nahin

un se baDh kar aaina-dar-aina koi nahin

dar pe pahra hai lagi hain qainchiyan diwar par

ho bhala didar kaise rasta koi nahin

jhank kar khiDki se KHud parda gira dete hain wo

jab ki is manzar se manzar KHushnuma koi nahin

mah-ruKH ki zulf se aise bana pur-nur chand

ishq ki duniya mein is jaisi ziya koi nahin

gum hua rahta hun un ki yaad mein har aan main

is se baDh kar aur ehsas-e-wafa koi nahin

meri KHwahish hai sada phulo-phalo jaan-e-bahaar

dil ki dhaDkan se bhi aage ki dua koi nahin

dekhiye maghrib se nikla hai hamara aaftab

hum ko hairat ye hui hairat-zada koi nahin

meri mayyat qabr tak dushman ke kandhe par gai

kaenat-e-ishq se aaya gaya koi nahin

qabr ki aaghosh mein ja kar 'falak zahir hua

monis-o-hamdam amal ke ma-siwa koi nahin