chhoD kar wo hum ko tanha kis jahan mein ja basa

chhoḌ kar vo ham ko tanhā kis jahāñ meñ jā basā

laakh us ko milnā chāhā par rahā vo nā-rasā

sach hī kahtā thā hameñ vo chhoḌ jab maiñ jā.ūñgā

mujh ko DhūñDā tum karoge har galī meñ jā-ba-jā

tab hameñ dikhlāvā lagtā thā vo māthā chūmnā

aaj jis ke vāste hai dil meñ mere ishtihā

chhoḌ kar jab vo gayā tab saare dushman ho ga.e

phir hameñ rusvā kiyā thā mil ke sab ne nāravā

tere hote to na himmat thī kisī kī kuchh kahe

ba.ad tere sab ke lahje ho ga.e the nāravā

kis tarah TuuTī qayāmat ham se mat ye pūchhnā

ab nahīñ hai sabr baaqī dard kī hai intihā

ai ḳhudā shikva nahīñ 'sā.il' ko terī zaat se

maañ mirī ko baḳhsh de tū tujh se hai bas ye duā

chhoD kar wo hum ko tanha kis jahan mein ja basa

lakh us ko milna chaha par raha wo na-rasa

sach hi kahta tha hamein wo chhoD jab main jaunga

mujh ko DhunDa tum karoge har gali mein ja-ba-ja

tab hamein dikhlawa lagta tha wo matha chumna

aaj jis ke waste hai dil mein mere ishtiha

chhoD kar jab wo gaya tab sare dushman ho gae

phir hamein ruswa kiya tha mil ke sab ne narawa

tere hote to na himmat thi kisi ki kuchh kahe

baad tere sab ke lahje ho gae the narawa

kis tarah TuTi qayamat hum se mat ye puchhna

ab nahin hai sabr baqi dard ki hai intiha

ai KHuda shikwa nahin 'sail' ko teri zat se

man meri ko baKHsh de tu tujh se hai bas ye dua