chhoD ke farzanon ki mahfil tanha is diwane ko

chhoḌ ke farzānoñ kī mahfil tanhā is dīvāne ko

hazrat-e-nāseh kyoñ aa jaate haiñ aksar samjhāne ko

kam-zarfoñ ke dar kī ġhulāmī mere bas kī baat nahīñ

aise jiine par maiñ kyoñ tarjīh na duuñ mar jaane ko

maut se jin ko Dar lagtā hai hoñge vo log aur koī

har lamha tayyār haiñ ham tūfāñ se aañkh milāne ko

ye hai masjid vo hai mandir ye hai kalīsā vo gurū-dvār

baañT diyā kitne hisse meñ ham ne ibādat-ḳhāne ko

maut ke Dar se sab ḳhāmosh raheñge ye nā-mumkin hai

koī na koī to uTThegā bātil se Takrāne ko

nafrat aur adāvat kī ta.alīm jahāñ dī jaatī hai

jī kartā hai aag lagā duuñ aise ibādat-ḳhāne ko

azm-e-sādiq le kar jab dariyā meñ koī utregā

ā.eñgī phir maujeñ ḳhud hī kashtī paar lagāne ko

'tābish' bas ye soch ke maiñ ne aag lagā dī kashtī meñ

bhuul ke bhī ab koī na soche lauT ke vāpas jaane ko

chhoD ke farzanon ki mahfil tanha is diwane ko

hazrat-e-naseh kyon aa jate hain aksar samjhane ko

kam-zarfon ke dar ki ghulami mere bas ki baat nahin

aise jine par main kyon tarjih na dun mar jaane ko

maut se jin ko Dar lagta hai honge wo log aur koi

har lamha tayyar hain hum tufan se aankh milane ko

ye hai masjid wo hai mandir ye hai kalisa wo guru-dwar

banT diya kitne hisse mein hum ne ibaadat-KHane ko

maut ke Dar se sab KHamosh rahenge ye na-mumkin hai

koi na koi to uTThega baatil se Takrane ko

nafrat aur adawat ki talim jahan di jati hai

ji karta hai aag laga dun aise ibaadat-KHane ko

azm-e-sadiq le kar jab dariya mein koi utrega

aaengi phir maujen KHud hi kashti par lagane ko

'tabish' bas ye soch ke main ne aag laga di kashti mein

bhul ke bhi ab koi na soche lauT ke wapas jaane ko