چھوڑ یہ پیار محبت کے لطیفے پاگل

چھوڑ یہ پیار محبت کے لطیفے پاگل

مجھ کو کر دیں گے مری جان یہ قصے پاگل

عشق چڑھ جاتا ہے سولی پہ انا الحق کہہ کر

روز ہوتے ہیں ترے شہر میں کتنے پاگل

ساتھ رہنا ہی مقدر ہے مگر میل نہیں

ہم ہیں دریا کے وہ معصوم کنارے پاگل

لطف لیتے ہیں بہاروں کا خزاں میں رہ کر

ایسے ہوتے ہیں ترے عشق کے مارے پاگل

کیا کہا عشق ترا تجھ کو ملے گا اک دن

تو نہیں جانتا دنیا مرے پیارے پاگل

میں سمجھتی ہوں کے انعام خداوندی ہے

جتنے ہوتے ہیں محبت میں خسارے پاگل

مدتوں بعد دعاؤں کا اثر کل دیکھا

میں نے بے ساختہ پوچھا کہ کہاں تھے پاگل

ہر گلی کوچے میں روشن ہے ترے نام سے عشق

ایک ہم ہی تو نہیں تیرے اکیلے پاگل