chhoD ye pyar mohabbat ke latife pagal

chhoḌ ye pyaar mohabbat ke latīfe pāgal

mujh ko kar deñge mirī jaan ye qisse pāgal

'ishq chaḌh jaatā hai suulī pe anal-haq kah kar

roz hote haiñ tire shahr meñ kitne pāgal

saath rahnā hī muqaddar hai magar mel nahīñ

ham haiñ dariyā ke vo mā'sūm kināre pāgal

lutf lete haiñ bahāroñ kā ḳhizāñ meñ rah kar

aise hote haiñ tire 'ishq ke maare pāgal

kyā kahā 'ishq tirā tujh ko milegā ik din

tū nahīñ jāntā duniyā mire pyāre pāgal

maiñ samajhtī huuñ ke in'ām-e-ḳhudāvandī hai

jitne hote haiñ mohabbat meñ ḳhasāre pāgal

muddatoñ baa'd du'āoñ kā asar kal dekhā

maiñ ne be-sāḳhta pūchhā ki kahāñ the pāgal

har galī kūche meñ raushan hai tire naam se 'ishq

ek ham hī to nahīñ tere akele pāgal

chhoD ye pyar mohabbat ke latife pagal

mujh ko kar denge meri jaan ye qisse pagal

'ishq chaDh jata hai suli pe anal-haq kah kar

roz hote hain tere shahr mein kitne pagal

sath rahna hi muqaddar hai magar mel nahin

hum hain dariya ke wo ma'sum kinare pagal

lutf lete hain bahaaron ka KHizan mein rah kar

aise hote hain tere 'ishq ke mare pagal

kya kaha 'ishq tera tujh ko milega ek din

tu nahin jaanta duniya mere pyare pagal

main samajhti hun ke in'am-e-KHudawandi hai

jitne hote hain mohabbat mein KHasare pagal

muddaton ba'd du'aon ka asar kal dekha

main ne be-saKHta puchha ki kahan the pagal

har gali kuche mein raushan hai tere nam se 'ishq

ek hum hi to nahin tere akele pagal