chhoDa tha apna des ki qadren badal gain

chhoḌā thā apnā des ki qadreñ badal ga.iiñ

pahuñchā jo shahr-e-nau meñ to samteñ badal ga.iiñ

ḳhāna-ḳharāb-hāl se be-kaifiyāñ na pūchh

shāmeñ udaas ho ga.iiñ bazmeñ badal ga.iiñ

kahnā jo koī bichhḌā huā mujh ko pūchh le

us shā.ir-e-jamāl kī fikreñ badal ga.iiñ

ai shahr-e-ḳhāmushāñ mire apne kahāñ ga.e

katbe zamīñ nigal ga.ī qabreñ badal ga.iiñ

ab pyaar meñ vafāoñ kī rasmeñ nahīñ rahīñ

zulfoñ meñ qaid rahne kī sharteñ badal ga.iiñ

āzādiyoñ ke raqs-e-barahna kā daur hai

ajdād the ġhulām vo nasleñ badal ga.iiñ

haañ haañ yahī dayār tirā kū-e-yār hai

'rizvāñ' ye kyā huā tirī nazreñ badal ga.iiñ

chhoDa tha apna des ki qadren badal gain

pahuncha jo shahr-e-nau mein to samten badal gain

KHana-KHarab-haal se be-kaifiyan na puchh

shamen udas ho gain bazmen badal gain

kahna jo koi bichhDa hua mujh ko puchh le

us shair-e-jamal ki fikren badal gain

ai shahr-e-KHamushan mere apne kahan gae

katbe zamin nigal gai qabren badal gain

ab pyar mein wafaon ki rasmen nahin rahin

zulfon mein qaid rahne ki sharten badal gain

aazadiyon ke raqs-e-barahna ka daur hai

ajdad the ghulam wo naslen badal gain

han han yahi dayar tera ku-e-yar hai

'rizwan' ye kya hua teri nazren badal gain