chhoDenge gareban ka na ek tar kabhi hum

chhoḌeñge garebāñ kā na ik taar kabhī ham

baiTheñge junūñ meñ to na bekār kabhī ham

rahte na ijāzat ke talabgār kabhī ham

hote jo tire tālib-e-dīdār kabhī ham

pahnā.egā ham ko vo gul-e-zaḳhm kī baddhī

pahnā.eñge qātil ko jo ik haar kabhī ham

dīvāna-navāzī hai ki sar ko diye patthar

chhoḌeñge na ab dāman-e-kohsār kabhī ham

vallāh butoñ se nahīñ karne ke mohabbat

rakkheñge na ab rishta-e-zunnār kabhī ham

anqā ho jahāñ se mirī jaañ nām-e-humā bhī

paa.eñ jo tirā sāya-e-dīvār kabhī ham

phāhe to rahe daaġh junūñ par pa-e-jannat

kyā Dar hai jo rakhte nahīñ dastār kabhī ham

tajvīz kiyā kījiyegā yuuñ haiñ sazā.eñ

yā rahm ke bhī hoñge sazā-vār kabhī ham

fursat nahīñ miltī hai ġhazal kahne kī ai mehr

paḌhte haiñ tab is Dhañg ke ash.ār kabhī ham

chhoDenge gareban ka na ek tar kabhi hum

baiThenge junun mein to na bekar kabhi hum

rahte na ijazat ke talabgar kabhi hum

hote jo tere talib-e-didar kabhi hum

pahnaega hum ko wo gul-e-zaKHm ki baddhi

pahnaenge qatil ko jo ek haar kabhi hum

diwana-nawazi hai ki sar ko diye patthar

chhoDenge na ab daman-e-kohsar kabhi hum

wallah buton se nahin karne ke mohabbat

rakkhenge na ab rishta-e-zunnar kabhi hum

anqa ho jahan se meri jaan nam-e-huma bhi

paen jo tera saya-e-diwar kabhi hum

phahe to rahe dagh junun par pa-e-jannat

kya Dar hai jo rakhte nahin dastar kabhi hum

tajwiz kiya kijiyega yun hain sazaen

ya rahm ke bhi honge saza-war kabhi hum

fursat nahin milti hai ghazal kahne ki ai mehr

paDhte hain tab is Dhang ke ashaar kabhi hum