chhoDo ab us charagh ka charcha bahut hua

chhoḌo ab us charāġh kā charchā bahut huā

apnā to sab ke hāthoñ ḳhasāra bahut huā

kyā be-sabab kisī se kahīñ uubte haiñ log

bāvar karo ki zikr tumhārā bahut huā

baiThe rahe ki tez bahut thī havā-e-shauq

dasht-e-havas kā garche irāda bahut huā

āḳhir ko uTh ga.e the jo ik baat kah ke ham

sunte haiñ phir usī kā i.aada bahut huā

milne diyā na us se hameñ jis ḳhayāl ne

sochā to is ḳhayāl se sadma bahut huā

achchhā to ab safar ho kisī aur samt meñ

ye roz-o-shab kā jāgnā sonā bahut huā

chhoDo ab us charagh ka charcha bahut hua

apna to sab ke hathon KHasara bahut hua

kya be-sabab kisi se kahin ubte hain log

bawar karo ki zikr tumhaara bahut hua

baiThe rahe ki tez bahut thi hawa-e-shauq

dasht-e-hawas ka garche irada bahut hua

aaKHir ko uTh gae the jo ek baat kah ke hum

sunte hain phir usi ka iada bahut hua

milne diya na us se hamein jis KHayal ne

socha to is KHayal se sadma bahut hua

achchha to ab safar ho kisi aur samt mein

ye roz-o-shab ka jagna sona bahut hua