chhoDti hi nahin mujhko shab-e-furqat meri

chhoḌtī hī nahīñ mujh ko shab-e-furqat merī

ai meñ qurbān use itnī mohabbat merī

kyuuñ kar uupar uTheñ āñkheñ mirī ai hasrat-e-dīd

sar uThāne nahīñ detī hai nadāmat merī

phuuT kar rone se ashkoñ kā marā hai paanī

be-bahār aa.e khulī jaatī hai turbat merī

vasl kī shab vo Darāte haiñ ye kah kah ke mujhe

tum satāo tumheñ kosegī nazākat merī

jalva-e-yār ne behosh kiyā hai mujh ko

kuchh alag nashsha-e-mai se rahī ġhaflat merī

aañkh tāroñ ne churā.ī ye na.ī baat hai aaj

dekhiye kaTtī hai kyuuñ kar shab-e-ġhurbat merī

rahn-e-mai hone se bach jaa.e to izzat rah jaa.e

mol le le koī dastār-e-fazīlat merī

raheñ tā-hashr yūñhī mehñdī lage paañv ke naqsh

chaar phūloñ kī na mohtāj ho turbat merī

taare mujh ko nazar aa.eñ na kahīñ hashr ke din

Dar se baḌh jaa.e na had se shab-e-furqat merī

chheḌ kar majma-e-zuhhād ko Dartā huuñ 'riyāz'

kohna masjid kī evaz ho na marammat merī

chhoDti hi nahin mujh ko shab-e-furqat meri

ai mein qurban use itni mohabbat meri

kyun kar upar uThen aankhen meri ai hasrat-e-did

sar uThane nahin deti hai nadamat meri

phuT kar rone se ashkon ka mara hai pani

be-bahaar aae khuli jati hai turbat meri

wasl ki shab wo Daraate hain ye kah kah ke mujhe

tum satao tumhein kosegi nazakat meri

jalwa-e-yar ne behosh kiya hai mujh ko

kuchh alag nashsha-e-mai se rahi ghaflat meri

aankh taron ne churai ye nai baat hai aaj

dekhiye kaTti hai kyun kar shab-e-ghurbat meri

rahn-e-mai hone se bach jae to izzat rah jae

mol le le koi dastar-e-fazilat meri

rahen ta-hashr yunhi mehndi lage panw ke naqsh

chaar phulon ki na mohtaj ho turbat meri

tare mujh ko nazar aaen na kahin hashr ke din

Dar se baDh jae na had se shab-e-furqat meri

chheD kar majma-e-zuhhad ko Darta hun 'riyaz'

kohna masjid ki ewaz ho na marammat meri