chhoTa sa ek kaam hamara nahin kiya

chhoTā sā ek kaam hamārā nahīñ kiyā

'bāsir' tumhāre yaar ne achchhā nahīñ kiyā

rahtī rahī hai koī na koī kamī zarūr

aisā nahīñ kiyā kabhī vaisā nahīñ kiyā

do chaar baar dekh lo ḳhud jā ke us ke paas

kuchh be-sabab to ham ne kinārā nahīñ kiyā

kahte rahe ho tum use hamdard-o-ġham-gusār

aur us ne baat karnā gavārā nahīñ kiyā

gar thiiñ nigāh meñ mirī kotāhiyāñ to Thiik

aġhyār ne to koī ishāra nahīñ kiyā

hairāñ huuñ log kahte haiñ kyoñ us ko chārāgar

jis ne kisī marīz ko achchhā nahīñ kiyā

din raat ham ko qarz chukāne kī fikr hai

go us ne vāpsī kā taqāzā nahīñ kiyā

hote jo aaj un kī nigāhoñ meñ sarfarāz

ham ne to koī kaam bhī aisā nahīñ kiyā

chhoTa sa ek kaam hamara nahin kiya

'basir' tumhaare yar ne achchha nahin kiya

rahti rahi hai koi na koi kami zarur

aisa nahin kiya kabhi waisa nahin kiya

do chaar bar dekh lo KHud ja ke us ke pas

kuchh be-sabab to hum ne kinara nahin kiya

kahte rahe ho tum use hamdard-o-gham-gusar

aur us ne baat karna gawara nahin kiya

gar thin nigah mein meri kotahiyan to Thik

aghyar ne to koi ishaara nahin kiya

hairan hun log kahte hain kyon us ko chaaragar

jis ne kisi mariz ko achchha nahin kiya

din raat hum ko qarz chukane ki fikr hai

go us ne wapsi ka taqaza nahin kiya

hote jo aaj un ki nigahon mein sarfaraaz

hum ne to koi kaam bhi aisa nahin kiya