chhoTi si baat par tera lahja badal gaya

chhoTī sī baat par tirā lahja badal gayā

tū dekhte hī dekhte kaisā badal gayā

kyoñ iḳhtilāf-e-rā.e ne tahzīb chhīn lī

ye kyā ki guftugū kā qarīna badal gayā

khañDarāt meñ badal gayā har rāsta yahāñ

aur kāġhazoñ meñ shahr kā naqsha badal gayā

kitnī sahūlateñ hameñ hāsil thiiñ qaid meñ

thoḌā sā phaḌphaḌā.e to piñjra badal gayā

jab maiñ kisī ke saath huā us ke rū-barū

mujh se to aa.ine kā ravayya badal gayā

pahle sā aaj kuchh bhī nahīñ hai 'umair' meñ

ab aa.e ho ki jab mirā huliya badal gayā

chhoTi si baat par tera lahja badal gaya

tu dekhte hi dekhte kaisa badal gaya

kyon iKHtilaf-e-rae ne tahzib chhin li

ye kya ki guftugu ka qarina badal gaya

khanDaraat mein badal gaya har rasta yahan

aur kaghazon mein shahr ka naqsha badal gaya

kitni sahulaten hamein hasil thin qaid mein

thoDa sa phaDphaDae to pinjra badal gaya

jab main kisi ke sath hua us ke ru-baru

mujh se to aaine ka rawayya badal gaya

pahle sa aaj kuchh bhi nahin hai 'umair' mein

ab aae ho ki jab mera huliya badal gaya