chhoTi si ek uDan bhari aur bikhar gaya

chhoTī sī ik uḌaan bharī aur bikhar gayā

chiḌiyā kā boT pañkhe se Takrā ke mar gayā

sarmā kī chāñdnī thī javānī guzar ga.ī

jhulsā rahī hai dhuup buḌhāpā Thahar gayā

tā-sub.h jhilmilā.ī mire āñsūon meñ shab

bujhtā huā charāġh sitāroñ se bhar gayā

panhāriyoñ ne gāgaroñ meñ niir bhar liye

chaḌhtī nadī kā mast bahāv utar gayā

āvāz kī namī thī jo lafzoñ tak aa ga.ī

ik ghūñT āñsūon kā gale meñ Thahar gayā

hairat kī mūrtī banī maiñ dekhtī rahī

vo apne ghar ko chhoḌ ke aage guzar gayā

maiñ raftagāñ kī baat pe be-sāḳhta hañsī

anjām is hañsī kā bhī afsurda-tar gayā

ḳhālī galī meñ saare makāñ sochte rahe

kis samt is ko aanā thā aur kis nagar gayā

ik ham-safar jo mere ḳharābe meñ saath thā

sochoñ meñ jī rahā hai magar dil meñ mar gayā

chunarī talāsh karne meñ kuchh der ho ga.ī

dar par khaḌā huā thā jo ik ḳhvāb mar gayā

chhoTi si ek uDan bhari aur bikhar gaya

chiDiya ka boT pankhe se Takra ke mar gaya

sarma ki chandni thi jawani guzar gai

jhulsa rahi hai dhup buDhapa Thahar gaya

ta-subh jhilmilai mere aansuon mein shab

bujhta hua charagh sitaron se bhar gaya

panhaariyon ne gagaron mein nir bhar liye

chaDhti nadi ka mast bahaw utar gaya

aawaz ki nami thi jo lafzon tak aa gai

ek ghunT aansuon ka gale mein Thahar gaya

hairat ki murti bani main dekhti rahi

wo apne ghar ko chhoD ke aage guzar gaya

main raftagan ki baat pe be-saKHta hansi

anjam is hansi ka bhi afsurda-tar gaya

KHali gali mein sare makan sochte rahe

kis samt is ko aana tha aur kis nagar gaya

ek ham-safar jo mere KHarabe mein sath tha

sochon mein ji raha hai magar dil mein mar gaya

chunari talash karne mein kuchh der ho gai

dar par khaDa hua tha jo ek KHwab mar gaya