chhupa chhupa hai manzar kaun

chhupā chhupā hai manzar kaun

kaun hai andar bāhar kaun

lahreñ sī mujh meñ kaisī

pheñk rahā hai patthar kaun

sab apnī apnī dhun meñ

badle mirā muqaddar kaun

kis kī taraf dekhā jaa.e

hai naḳhl-e-bār-āvar kaun

terī nazar meñ ochhe sab

ālī-zarf samundar kaun

kis kī chamak ā.īnoñ meñ

raushan kaun munavvar kaun

paañv tale dhartī kis kī

sar par taane chādar kaun

ab to bahut mushkil hai tamīz

patthar kaun hai aazar kaun

sab apne paikar meñ haiñ

sarv hai kaun sanobar kaun

tū to gale se lagā hai dekh

ghoñp rahā hai ḳhanjar kaun

apnī apnī adākārī

muflis kaun tavangar kaun

ghar bāhar sab ek sā hai

nikle ghar se bāhar kaun

sab kā mehvar koī to hai

gardish meñ be-mehvar kaun

ā.īna merā hai 'vaqār'

lekin is meñ shashdar kaun

chhupa chhupa hai manzar kaun

kaun hai andar bahar kaun

lahren si mujh mein kaisi

phenk raha hai patthar kaun

sab apni apni dhun mein

badle mera muqaddar kaun

kis ki taraf dekha jae

hai naKHl-e-bar-awar kaun

teri nazar mein ochhe sab

aali-zarf samundar kaun

kis ki chamak aainon mein

raushan kaun munawwar kaun

panw tale dharti kis ki

sar par tane chadar kaun

ab to bahut mushkil hai tamiz

patthar kaun hai aazar kaun

sab apne paikar mein hain

sarw hai kaun sanobar kaun

tu to gale se laga hai dekh

ghonp raha hai KHanjar kaun

apni apni adakari

muflis kaun tawangar kaun

ghar bahar sab ek sa hai

nikle ghar se bahar kaun

sab ka mehwar koi to hai

gardish mein be-mehwar kaun

aaina mera hai 'waqar'

lekin is mein shashdar kaun