چھپا ہر چند تیرا درد پنہاں ہم سمجھتے ہیں

چھپا ہر چند تیرا درد پنہاں ہم سمجھتے ہیں

کہ سچ ہے اہل غم ہی دوسروں کا غم سمجھتے ہیں

کوئی ہم سا نہ ہوگا چاہنے والا تجھے ہمدم

نمک پاشی کو تیری زخم کا مرہم سمجھتے ہیں

مفکر فلسفی سائنسداں جو بھی سمجھتے ہوں

جہاں کو ہم مآل لغزش آدم سمجھتے ہیں

کبھی نازک مسائل پر نہ کرنا گفتگو ان سے

نئے فتنے جگایا کرتے ہیں جو کم سمجھتے ہیں

ہر افسانے میں ہے پنہاں مرے غم کا کوئی پہلو

تبھی تو سب مرے غم کو غم عالم سمجھتے ہیں