chhupa kar meri nazron se jamal-e-ru-e-taban ko

chhupā kar merī nazroñ se jamāl-e-rū-e-tābāñ ko

sahārā de rahā hai koī mere zauq-e-irfāñ ko

nahīñ jin ko mayassar muskurānā fasl-e-gul meñ bhī

vahī ġhunche badal dete haiñ taqdīr-e-gulistāñ ko

hamīñ har daur meñ hote haiñ memār-e-gulistāñ bhī

hamīñ dete haiñ zīnat bhī dar-o-dīvār-e-zindāñ ko

jidhar dekho udhar vīrāniyāñ haiñ sehn-e-gulshan meñ

nahīñ mālūm ādāb-e-chaman-bandī nigahbāñ ko

junūñ-sāmānī-e-fasl-e-bahārāñ par na harf aa.e

chhupāte phir rahe haiñ har taraf chāk-e-garebāñ ko

sunā hai jab se ye bhī ik amānat hai tire ġham kī

kaleje se lagā.e phir rahā huuñ dāġh-e-hirmāñ ko

manā leñge haram vāloñ ko jā kar phir kabhī 'muslim'

abhī to raam karnā hai butān-e-fitna-sāmāñ ko

chhupa kar meri nazron se jamal-e-ru-e-taban ko

sahaara de raha hai koi mere zauq-e-irfan ko

nahin jin ko mayassar muskurana fasl-e-gul mein bhi

wahi ghunche badal dete hain taqdir-e-gulistan ko

hamin har daur mein hote hain memar-e-gulistan bhi

hamin dete hain zinat bhi dar-o-diwar-e-zindan ko

jidhar dekho udhar viraniyan hain sehn-e-gulshan mein

nahin malum aadab-e-chaman-bandi nigahban ko

junun-samani-e-fasl-e-bahaaran par na harf aae

chhupate phir rahe hain har taraf chaak-e-gareban ko

suna hai jab se ye bhi ek amanat hai tere gham ki

kaleje se lagae phir raha hun dagh-e-hirman ko

mana lenge haram walon ko ja kar phir kabhi 'muslim'

abhi to ram karna hai butan-e-fitna-saman ko