chhupae dil mein hum akasr teri talab bhi chale

chhupā.e dil meñ ham akasr tirī talab bhī chale

kabhī kabhī tire hamrāh be-sabab bhī chale

numūd-e-gul ke karishme sadā jilau meñ rahe

nasīm ban ke chale ham chaman meñ jab bhī chale

jalāo ḳhūn-e-shahīdāñ se irtiqā ke charāġh

ye rasm chaltī rahī hai ye rasm ab bhī chale

sunā hai jāda-navardān-e-sub.h ke hamrāh

ba-faiz-e-vaqt ka.ī rah-ravān-e-shab bhī chale

hai shor-e-shabnam-e-āsūdgī ke dosh-ba-dosh

gul aaj le ke kahīñ shola-e-ġhazab bhī chale

kisī kā hukm-e-zabāñ-bandī-e-junūñ bhī chalā

kisī ke qisse suḳhan ban ke zer-e-lab bhī chale

hamīñ ne sāġhar-e-ġham muntaḳhab kiyā 'ārif'

vagarna bazm meñ kuchh sāġhar-e-tarab bhī chale

chhupae dil mein hum akasr teri talab bhi chale

kabhi kabhi tere hamrah be-sabab bhi chale

numud-e-gul ke karishme sada jilau mein rahe

nasim ban ke chale hum chaman mein jab bhi chale

jalao KHun-e-shahidan se irtiqa ke charagh

ye rasm chalti rahi hai ye rasm ab bhi chale

suna hai jada-nawardan-e-subh ke hamrah

ba-faiz-e-waqt kai rah-rawan-e-shab bhi chale

hai shor-e-shabnam-e-asudgi ke dosh-ba-dosh

gul aaj le ke kahin shola-e-ghazab bhi chale

kisi ka hukm-e-zaban-bandi-e-junun bhi chala

kisi ke qisse suKHan ban ke zer-e-lab bhi chale

hamin ne saghar-e-gham muntaKHab kiya 'arif'

wagarna bazm mein kuchh saghar-e-tarab bhi chale