chhupate rahte hain dukh-dard ro nahin pate

chhupāte rahte haiñ dukh-dard ro nahīñ paate

ye vo jahāñ hai jahāñ mard ro nahīñ paate

vo ḳhushk-sālī hai ab ke ki dukh meñ bhī ham log

saroñ meñ Daal to leñ gard ro nahīñ paate

ab is samāj ko nukta ye kaun samjhā.e

rulāne lagte haiñ jo mard ro nahīñ paate

shajar qabīla hai apnā so ham se jo bichhḌe

hare se hote haiñ ham zard ro nahīñ paate

satātī rahtī thī ham ko talab mohabbat kī

vo aag jab se huī sard ro nahīñ paate

baḌhā chaḌhā ke batātā huuñ un ko apnā dukh

maiñ kyā karūñ mire hamdard ro nahīñ paate

mazāq uḌāne kī logoñ ko aisī 'ādat hai

ki mar bhī jaa.e koī fard ro nahīñ paate

chhupate rahte hain dukh-dard ro nahin pate

ye wo jahan hai jahan mard ro nahin pate

wo KHushk-sali hai ab ke ki dukh mein bhi hum log

saron mein Dal to len gard ro nahin pate

ab is samaj ko nukta ye kaun samjhae

rulane lagte hain jo mard ro nahin pate

shajar qabila hai apna so hum se jo bichhDe

hare se hote hain hum zard ro nahin pate

satati rahti thi hum ko talab mohabbat ki

wo aag jab se hui sard ro nahin pate

baDha chaDha ke batata hun un ko apna dukh

main kya karun mere hamdard ro nahin pate

mazaq uDane ki logon ko aisi 'adat hai

ki mar bhi jae koi fard ro nahin pate