chhupi hui kahin sajdon mein sar-kashi to nahin

chhupī huī kahīñ sajdoñ meñ sar-kashī to nahīñ

ye merī rasm-e-ibādat bhī bandagī to nahīñ

baġhair vaj.h ye saaqī kī be-ruḳhī to nahīñ

maiñ sochtā huuñ kahīñ kuchh ḳhatā huī to nahīñ

maiñ mutma.in huuñ magar sirf ye batā diije

ye ġham jo aap ne baḳhshā hai aarzī to nahīñ

sabhī ke dil meñ mohabbat kī aag hotī hai

sabhī ko raas bhī aa.e ye lāzmī to nahīñ

ajal kā chehra nazar aa.e kuchh bañdhe Dhāras

rah-e-hayāt meñ itnī bhī raushnī to nahīñ

tasavvurāt meñ kuchh der kho to jaatā huuñ

magar ab in meñ bhī aglī sī dilkashī to nahīñ

chaman vahī hai bahāreñ vahī haiñ gul bhī vahī

magar guloñ meñ vo ḳhushbū vo tāzgī to nahīñ

har ek chiiz nazar aatī hai udaas udaas

kahīñ ye mere hī ehsās kī kamī to nahīñ

ye saare rañj ba-qaid-e-hayāt hī to nahīñ

hayāt merī koī umr ḳhizar kī to nahīñ

kisī pe barse koī buuñd buuñd ko tarse

ye aur jo bhī ho saaqī kī munsifī to nahīñ

kabhī jo 'nūr' koī rishta-e-vafā TuuTe

ye dekh lenā ki āñkhoñ meñ kuchh namī to nahīñ

chhupi hui kahin sajdon mein sar-kashi to nahin

ye meri rasm-e-ibaadat bhi bandagi to nahin

baghair wajh ye saqi ki be-ruKHi to nahin

main sochta hun kahin kuchh KHata hui to nahin

main mutmain hun magar sirf ye bata dije

ye gham jo aap ne baKHsha hai aarzi to nahin

sabhi ke dil mein mohabbat ki aag hoti hai

sabhi ko ras bhi aae ye lazmi to nahin

ajal ka chehra nazar aae kuchh bandhe Dhaaras

rah-e-hayat mein itni bhi raushni to nahin

tasawwuraat mein kuchh der kho to jata hun

magar ab in mein bhi agli si dilkashi to nahin

chaman wahi hai bahaaren wahi hain gul bhi wahi

magar gulon mein wo KHushbu wo tazgi to nahin

har ek chiz nazar aati hai udas udas

kahin ye mere hi ehsas ki kami to nahin

ye sare ranj ba-qaid-e-hayat hi to nahin

hayat meri koi umr KHizar ki to nahin

kisi pe barse koi bund bund ko tarse

ye aur jo bhi ho saqi ki munsifi to nahin

kabhi jo 'nur' koi rishta-e-wafa TuTe

ye dekh lena ki aankhon mein kuchh nami to nahin