چھٹ کے اب تجھ سے یہ عالم ہے کہ روتے نہ بنے

چھٹ کے اب تجھ سے یہ عالم ہے کہ روتے نہ بنے

زندہ رہتے نہ بنے جان بھی کھوتے نہ بنے

شورش غم بھی نہیں شیوۂ ارباب وفا

انگلیاں اپنے لہو میں بھی ڈبوتے نہ بنے

اب تو ہر سانس پہ دنیا کا خیال آتا ہے

اب تو دامن بھی ترے غم میں بھگوتے نہ بنے

کشمکش آج ہے وہ مستی و ہشیاری کی

تیرے گیسو کی گھنی چھاؤں میں سوتے نہ بنے

دل کا یہ حال کہ اب ضبط کا یارا بھی نہیں

پاس ناموس محبت بھی کہ روتے نہ بنے

بات بنتی ہے کہیں اشک ندامت سے پیامؔ

داغ دامن کے کسی طرح بھی دھوتے نہ بنے