chhuT ke ab tujhse ye aalam hai ki rote na bane

chhuT ke ab tujh se ye aalam hai ki rote na bane

zinda rahte na bane jaan bhī khote na bane

shorish-e-ġham bhī nahīñ sheva-e-arbāb-e-vafā

uñgliyāñ apne lahū meñ bhī Dubote na bane

ab to har saañs pe duniyā kā ḳhayāl aatā hai

ab to dāman bhī tire ġham meñ bhigote na bane

kashmakash aaj hai vo mastī-o-hushyārī kī

tere gesū kī ghanī chhāñv meñ sote na bane

dil kā ye haal ki ab zabt kā yaarā bhī nahīñ

pās-e-nāmūs-e-mohabbat bhī ki rote na bane

baat bantī hai kahīñ ashk-e-nadāmat se 'payām'

daaġh dāman ke kisī tarah bhī dhote na bane

chhuT ke ab tujh se ye aalam hai ki rote na bane

zinda rahte na bane jaan bhi khote na bane

shorish-e-gham bhi nahin shewa-e-arbab-e-wafa

ungliyan apne lahu mein bhi Dubote na bane

ab to har sans pe duniya ka KHayal aata hai

ab to daman bhi tere gham mein bhigote na bane

kashmakash aaj hai wo masti-o-hushyari ki

tere gesu ki ghani chhanw mein sote na bane

dil ka ye haal ki ab zabt ka yara bhi nahin

pas-e-namus-e-mohabbat bhi ki rote na bane

baat banti hai kahin ashk-e-nadamat se 'payam'

dagh daman ke kisi tarah bhi dhote na bane