chhu lene ki sab koshishen bekar samajhna

chhū lene kī sab koshisheñ bekār samajhnā

dīvār ko bas sāya-e-dīvār samajhnā

oḌhe chalo dhūpoñ meñ kisī yaad kī chādar

gir jaao jahāñ ḳhema-e-ashjār samajhnā

bā-vasf-e-shikast-e-dil-o-jāñ laḌtā rahā huuñ

ai hārte lashkar mujhe sardār samajhnā

ik jism samajh kar jise tum TuuT paḌe ho

vo tum se lipaT jaa.e to talvār samajhnā

dīvār meñ ubhre hī chale aate haiñ chehre

is shab ko har ik shab se pur-asrār samajhnā

chhu lene ki sab koshishen bekar samajhna

diwar ko bas saya-e-diwar samajhna

oDhe chalo dhupon mein kisi yaad ki chadar

gir jao jahan KHema-e-ashjar samajhna

ba-wasf-e-shikast-e-dil-o-jaan laDta raha hun

ai haarte lashkar mujhe sardar samajhna

ek jism samajh kar jise tum TuT paDe ho

wo tum se lipaT jae to talwar samajhna

diwar mein ubhre hi chale aate hain chehre

is shab ko har ek shab se pur-asrar samajhna