chhu liya shoala-e-ruKHsar-e-sanam dekho to

chhū liyā sho.ala-e-ruḳhsār-e-sanam dekho to

kitne nā-āqibat-andesh haiñ ham dekho to

koī shikva hai na fariyād na ġham dekho to

jaane ab kaun sī manzil pe haiñ ham dekho to

ranj-o-ālām kī jaltī huī dopahroñ meñ

tum bhī chal kar kabhī do-chār qadam dekho to

Duubī Duubī sī nazar aatī hai kyoñ nabz-e-hayāt

aaj kyā baat hai kyoñ dard hai kam dekho to

dīda-o-dil meñ liye phirte haiñ ham aag hī aag

tum ko andāz-e-taġhāful kī qasam dekho to

kyā kisī rind kā dil toḌ diyā zāhid ne

kyoñ larazne lagī dīvār-e-haram dekho to

ham se ta.amīr-e-zamāna hai hamīñ par yaaro

toḌe jaate haiñ zamāne ke sitam dekho to

un ko ehsās hai aksar merī barbādī kā

kis bulandī pe hai ab qismat-e-ġham dekho to

chhu liya shoala-e-ruKHsar-e-sanam dekho to

kitne na-aqibat-andesh hain hum dekho to

koi shikwa hai na fariyaad na gham dekho to

jaane ab kaun si manzil pe hain hum dekho to

ranj-o-alam ki jalti hui dopahron mein

tum bhi chal kar kabhi do-chaar qadam dekho to

Dubi Dubi si nazar aati hai kyon nabz-e-hayat

aaj kya baat hai kyon dard hai kam dekho to

dida-o-dil mein liye phirte hain hum aag hi aag

tum ko andaz-e-taghaful ki qasam dekho to

kya kisi rind ka dil toD diya zahid ne

kyon larazne lagi diwar-e-haram dekho to

hum se tamir-e-zamana hai hamin par yaro

toDe jate hain zamane ke sitam dekho to

un ko ehsas hai aksar meri barbaadi ka

kis bulandi pe hai ab qismat-e-gham dekho to