chilman se jo daman ke kinare nikal aae

chilman se jo dāman ke kināre nikal aa.e

vārafta-nigāhī ke sahāre nikal aa.e

paimāna-ba-kaf saath tumhāre nikal aa.e

hañgāma-e-hastī se kināre nikal aa.e

ik sādgi-e-husn kī māsūm adā.eñ

rañgīn mazāmīñ ke ishāre nikal aa.e

daulat kā falak toḌ ke aalam kī jabīñ par

mazdūr kī qismat ke sitāre nikal aa.e

sab bhuul ga.e pech-o-ḳham-e-hosh meñ raste

is raah pe kuchh ishq ke maare nikal aa.e

sab Duub ga.e talḳhi-e-nākāmi-e-ġham meñ

kuchh aap ke dāman ke sahāre nikal aa.e

gustāḳhi-e-bārāñ se vo pairāhan-e-pur-nam

bhīge hue jalvoñ se sharāre nikal aa.e

ruḳhsat ke vo aañsū vo nigāhoñ kī udāsī

thī shaam magar sub.h ke taare nikal aa.e

āñkhoñ meñ nazar aane lage ḳhuun ke aañsū

uTTho ki bas ab surḳh sitāre nikal aa.e

rizvāñ se baġhāvat hai 'nushūr' aur mai-e-kausar

uqbā meñ bhī kuchh kaam hamāre nikal aa.e

chilman se jo daman ke kinare nikal aae

warafta-nigahi ke sahaare nikal aae

paimana-ba-kaf sath tumhaare nikal aae

hangama-e-hasti se kinare nikal aae

ek sadgi-e-husn ki masum adaen

rangin mazamin ke ishaare nikal aae

daulat ka falak toD ke aalam ki jabin par

mazdur ki qismat ke sitare nikal aae

sab bhul gae pech-o-KHam-e-hosh mein raste

is rah pe kuchh ishq ke mare nikal aae

sab Dub gae talKHi-e-nakaami-e-gham mein

kuchh aap ke daman ke sahaare nikal aae

gustaKHi-e-baran se wo pairahan-e-pur-nam

bhige hue jalwon se sharare nikal aae

ruKHsat ke wo aansu wo nigahon ki udasi

thi sham magar subh ke tare nikal aae

aankhon mein nazar aane lage KHun ke aansu

uTTho ki bas ab surKH sitare nikal aae

rizwan se baghawat hai 'nushur' aur mai-e-kausar

uqba mein bhi kuchh kaam hamare nikal aae