chob-e-sahra bhi wahan rashk-e-samar kahlae

chob-e-sahrā bhī vahāñ rashk-e-samar kahlā.e

ham ḳhizāñ-baḳht shajar ho ke hajar kahlā.e

ham tah-e-ḳhāk kiye jaañ kā araq un ke liye

aur pas-e-rāh-e-vafā gard-e-safar kahlā.e

un kī poroñ meñ sitāre bhī haiñ añgāre bhī

vo sadaf jism hue ātish-e-tar kahlā.e

apnī rāhoñ kā gulistān lage vīrāna

un kī dahlīz kī miTTī bhī guhar kahlā.e

jin kī ḳhairāt se lamhoñ kī laveñ jāgtī haiñ

shab-nizhādoñ meñ vahī dast-e-nigar kahlā.e

un ke katbe pe yahī vaqt ne likkhā hai ki vo

raushnī bāñTte the tiira nazar kahlā.e

vo to dīvāroñ meñ chuntā hai zamāne kā zamīr

ham hī kyā sañg-e-sar-e-rāhguzar kahlā.e

'shād' be-sarfa gayā umr kā sarmāya-e-harf

ham ki the jān-e-sadā guñg-e-hunar kahlā.e

chob-e-sahra bhi wahan rashk-e-samar kahlae

hum KHizan-baKHt shajar ho ke hajar kahlae

hum tah-e-KHak kiye jaan ka araq un ke liye

aur pas-e-rah-e-wafa gard-e-safar kahlae

un ki poron mein sitare bhi hain angare bhi

wo sadaf jism hue aatish-e-tar kahlae

apni rahon ka gulistan lage virana

un ki dahliz ki miTTi bhi guhar kahlae

jin ki KHairaat se lamhon ki lawen jagti hain

shab-nizhadon mein wahi dast-e-nigar kahlae

un ke katbe pe yahi waqt ne likkha hai ki wo

raushni banTte the tera nazar kahlae

wo to diwaron mein chunta hai zamane ka zamir

hum hi kya sang-e-sar-e-rahguzar kahlae

'shad' be-sarfa gaya umr ka sarmaya-e-harf

hum ki the jaan-e-sada gung-e-hunar kahlae