chubhan se dard se qurbat baDha raha hai koi

chubhan se dard se qurbat baḌhā rahā hai koī

dayār-e-dil se kahīñ duur jā rahā hai koī

samundaroñ se kaho kashtiyāñ Dubo Dāleñ

hamārī maut ke qisse sunā rahā hai koī

use batāo ḳhushī der tak nahīñ rahtī

mire ġhamoñ pe bahut muskurā rahā hai koī

mirā hī naam nahīñ hai mirī kahānī meñ

ki mujh se zaat ko merī chhupā rahā hai koī

kisī kī yaad ke jaale haiñ mere hujre meñ

udāsiyoñ se mirā ghar sajā rahā hai koī

tamām-shahr meñ ik ghar yahī thā ulfat kā

yahāñ bhī maut kā bistar bichhā rahā hai koī

mire lahū ko chhiḌak do tamām gulshan meñ

mirī vafāoñ pe uñglī uThā rahā hai koī

maiñ us se baat to kar luuñ ruko zarā 'sādiq'

mire daroñ se sadā.eñ lagā rahā hai koī

chubhan se dard se qurbat baDha raha hai koi

dayar-e-dil se kahin dur ja raha hai koi

samundaron se kaho kashtiyan Dubo Dalen

hamari maut ke qisse suna raha hai koi

use batao KHushi der tak nahin rahti

mere ghamon pe bahut muskura raha hai koi

mera hi nam nahin hai meri kahani mein

ki mujh se zat ko meri chhupa raha hai koi

kisi ki yaad ke jale hain mere hujre mein

udasiyon se mera ghar saja raha hai koi

tamam-shahr mein ek ghar yahi tha ulfat ka

yahan bhi maut ka bistar bichha raha hai koi

mere lahu ko chhiDak do tamam gulshan mein

meri wafaon pe ungli uTha raha hai koi

main us se baat to kar lun ruko zara 'sadiq'

mere daron se sadaen laga raha hai koi