چبھتا اگرچہ پاؤں میں کانٹا چلا گیا

چبھتا اگرچہ پاؤں میں کانٹا چلا گیا

لیکن سفر طویل تھا چلتا چلا گیا

وہ بھی کہیں پہ بھیڑ میں مجھ سے بچھڑ گئی

اکتا کے میں بھی چھوڑ کے دنیا چلا گیا

رخصت ہوا تو آنکھ میں آنسو تلک نہ تھے

ہنستا ہوا وہ ہاتھ ہلاتا چلا گیا

مدت کے بعد سامنا اک دوست سے ہوا

کچھ دیر ٹھہرا مجھ کو بھی دیکھا چلا گیا

خالص خدا کے واسطے ہوتی کوئی نماز

ضائع ہمارا آج بھی سجدہ چلا گیا

ہم سوچتے ہیں بیٹھ کے خلوت میں جب کبھی

شاہدؔ ہمارے آگے سے کیا کیا چلا گیا