چبھتی رہی سینے میں کوئی بات مسلسل

چبھتی رہی سینے میں کوئی بات مسلسل

پہلو ہی بدلتے رہے ہم رات مسلسل

ہوتے ہیں تصور میں وہ دن رات مسلسل

رہتی ہے مری ان سے ملاقات مسلسل

آغاز میں ہلکی سی چبھن دل میں تھی ناصح

آہستہ سے بڑھتی گئی پھر بات مسلسل

مشکل ہوا جاتا ہے اسے پہلو میں رکھنا

کرنے لگا دل ان کی شکایات مسلسل

مل جاتا خدا بھی جو کبھی ڈھونڈتے اس کو

جس طرح سے ڈھونڈا تمہیں دن رات مسلسل

سعدیؔ ہوا دشوار مری جان کا بچنا

ہونے لگیں اب ان کی عنایات مسلسل