chuna tha unki mohabbat ne aazma ke mujhe

chunā thā un kī mohabbat ne aazmā ke mujhe

supurd-e-ḳhāk kiyā aadmī banā ke mujhe

maiñ apne dil meñ ḳhud apnī vafā pe nādim huuñ

unheñ ḳhushī na huī ḳhaak meñ milā ke mujhe

lagī meñ aur lagātī hai ḳhaak parvāna

ma.āl-e-soz-e-mohabbat dikhā dikhā ke mujhe

ye mere dard-e-tamannā kī āzmā.ish hai

qafas meñ chhoḌ diyā gulsitāñ se lā ke mujhe

vo bazm aur mire baa'd jagmagā uTThī

bahut charāġh jalā.e ga.e bujhā ke mujhe

niyāz-mand huuñ tauf-e-haram bhī kar lūñgā

jo vaqt mil gayā sajdoñ se naqsh-e-pā ke mujhe

baḌā karam ho jo aise meñ yaad aa jaao

satā rahe haiñ bahut naqsh mā-sivā ke mujhe

ye ek din kā nahīñ 'umr bhar kā ronā hai

ḳhudā ke vāste dekho na muskurā ke mujhe

faroġh deñge kabhī sham'-e-anjuman kī tarah

abhī to dekh rahe haiñ jalā jalā ke mujhe

mudām rahtā hai 'maḳhmūr' kaif kā 'ālam

karam kiyā mire saaqī ne mai pilā ke mujhe

chuna tha un ki mohabbat ne aazma ke mujhe

supurd-e-KHak kiya aadmi bana ke mujhe

main apne dil mein KHud apni wafa pe nadim hun

unhen KHushi na hui KHak mein mila ke mujhe

lagi mein aur lagati hai KHak parwana

maal-e-soz-e-mohabbat dikha dikha ke mujhe

ye mere dard-e-tamanna ki aazmaish hai

qafas mein chhoD diya gulsitan se la ke mujhe

wo bazm aur mere ba'd jagmaga uTThi

bahut charagh jalae gae bujha ke mujhe

niyaz-mand hun tauf-e-haram bhi kar lunga

jo waqt mil gaya sajdon se naqsh-e-pa ke mujhe

baDa karam ho jo aise mein yaad aa jao

sata rahe hain bahut naqsh ma-siwa ke mujhe

ye ek din ka nahin 'umr bhar ka rona hai

KHuda ke waste dekho na muskura ke mujhe

farogh denge kabhi sham'-e-anjuman ki tarah

abhi to dekh rahe hain jala jala ke mujhe

mudam rahta hai 'maKHmur' kaif ka 'alam

karam kiya mere saqi ne mai pila ke mujhe