chup-chap nikal aae the sahra ki taraf hum

chup-chāp nikal aa.e the sahrā kī taraf ham

chalte hue kyā dekhte duniyā kī taraf ham

pāmāl kiye jaatī hai is vāste duniyā

baiThe haiñ tire naqsh-e-kaf-e-pā kī taraf ham

kis pyaas se ḳhālī huā mashkīza hamārā

dariyā se jo uTh aa.e haiñ sahrā kī taraf ham

kyā chāhtī hai niyyat-e-bāzār-e-zamāna

khiñchte chale jaate haiñ jo ashiyā kī taraf ham

ye ajnabī logoñ kī zarā bhiiḌ chhaTe to

jā.eñge kisī apne shanāsā kī taraf ham

'gauhar' ye zamīñ ham ko bahut yaad karegī

uTh jā.eñge jab ālam-e-bālā kī taraf ham

chup-chap nikal aae the sahra ki taraf hum

chalte hue kya dekhte duniya ki taraf hum

pamal kiye jati hai is waste duniya

baiThe hain tere naqsh-e-kaf-e-pa ki taraf hum

kis pyas se KHali hua mashkiza hamara

dariya se jo uTh aae hain sahra ki taraf hum

kya chahti hai niyyat-e-bazar-e-zamana

khinchte chale jate hain jo ashiya ki taraf hum

ye ajnabi logon ki zara bhiD chhaTe to

jaenge kisi apne shanasa ki taraf hum

'gauhar' ye zamin hum ko bahut yaad karegi

uTh jaenge jab aalam-e-baala ki taraf hum