chup hai wo mohr-ba-lab main bhi rahun achchha hai

chup hai vo mohr-ba-lab maiñ bhī rahūñ achchhā hai

halkā halkā ye mohabbat kā fusūñ achchhā hai

mausam-e-gul na sahī shaġhl-e-junūñ achchhā hai

hamdamo! tez rahe gardish-e-ḳhūñ, achchhā hai

tum bhī karte rahe talqīn sakūñ kī ḳhātir

maiñ bhī āvāra o sar-gashta rahūñ achchhā hai

vo bhī kyā ḳhuun ki ho jabr kī buniyād meñ jazb

jo yūñhī muft meñ bah jaa.e vo ḳhuuñ achchhā hai

baat vo aa.ī hai lab par ki kahe bin na rahūñ

aql jaame se ho bāhar to junūñ achchhā hai

gar bhaTakne hī kī Thānī hai rafīqoñ ne to ḳhair

muñh se kuchh kah na sakūñ saath to duuñ achchhā hai

dil kā ahvāl ki kuchh zikr-e-zamāna chheḌūñ

baat yuuñ chheḌnā achchhā hai ki yuuñ achchhā hai

maiñ ne kyā kyā na kahā sher meñ un se 'haqqī'

vo faqat sun ke ye kahte rahe huuñ achchhā hai

chup hai wo mohr-ba-lab main bhi rahun achchha hai

halka halka ye mohabbat ka fusun achchha hai

mausam-e-gul na sahi shaghl-e-junun achchha hai

hamdamo! tez rahe gardish-e-KHun, achchha hai

tum bhi karte rahe talqin sakun ki KHatir

main bhi aawara o sar-gashta rahun achchha hai

wo bhi kya KHun ki ho jabr ki buniyaad mein jazb

jo yunhi muft mein bah jae wo KHun achchha hai

baat wo aai hai lab par ki kahe bin na rahun

aql jame se ho bahar to junun achchha hai

gar bhaTakne hi ki Thani hai rafiqon ne to KHair

munh se kuchh kah na sakun sath to dun achchha hai

dil ka ahwal ki kuchh zikr-e-zamana chheDun

baat yun chheDna achchha hai ki yun achchha hai

main ne kya kya na kaha sher mein un se 'haqqi'

wo faqat sun ke ye kahte rahe hun achchha hai