chup the bargad KHushk mausam ka gila karte na the

chup the bargad ḳhushk mausam kā gilā karte na the

chal rahī thiiñ āñdhiyāñ patte sadā karte na the

ham rasīda the ki dekheñ dūsroñ ko sho.ala-pā

the safar meñ aur safar kī ibtidā karte na the

band thā paanī saf-ārā the ġhanīm-e-rū-siyāh

ham adā is par bhī rasm-e-karbalā karte na the

mutma.in the ahl-e-maqtal nīm-jāñ kar ke mujhe

kaisī hushyārī thī sar tan se judā karte na the

ham ko kis shab zinda rahne kī havas hotī na thī

din meñ ham kab ḳhud-kushī kā faisla karte na the

kaise dūr-andesh munsif the ki insāfan mujhe

mānte the be-ḳhatā lekin rihā karte na the

chup the bargad KHushk mausam ka gila karte na the

chal rahi thin aandhiyan patte sada karte na the

hum rasida the ki dekhen dusron ko shoala-pa

the safar mein aur safar ki ibtida karte na the

band tha pani saf-ara the ghanim-e-ru-siyah

hum ada is par bhi rasm-e-karbala karte na the

mutmain the ahl-e-maqtal nim-jaan kar ke mujhe

kaisi hushyari thi sar tan se juda karte na the

hum ko kis shab zinda rahne ki hawas hoti na thi

din mein hum kab KHud-kushi ka faisla karte na the

kaise dur-andesh munsif the ki insafan mujhe

mante the be-KHata lekin riha karte na the