chupke chupke gham ka khana koi humse sikh jae

chupke chupke ġham kā khānā koī ham se siikh jaa.e

jī hī jī meñ tilmilānā koī ham se siikh jaa.e

abr kyā aañsū bahānā koī ham se siikh jaa.e

barq kyā hai tilmilānā koī ham se siikh jaa.e

zikr-e-sham-e-husn laanā koī ham se siikh jaa.e

un ko dar-parda jalānā koī ham se siikh jaa.e

jhūT-mūT afyūn khānā koī ham se siikh jaa.e

un ko kaf lā kar Darānā koī ham se siikh jaa.e

sun ke aamad un kī az-ḳhud-rafta ho jaate haiñ ham

peshvā lene ko jaanā koī ham se siikh jaa.e

ham ne avval hī kahā thā tū karegā ham ko qatl

tevaroñ kā taaḌ jaanā koī ham se siikh jaa.e

lutf uThānā hai agar manzūr us ke naaz kā

pahle us kā naaz uThānā koī ham se siikh jaa.e

jo sikhāyā apnī qismat ne vagarna us ko ġhair

kyā sikhā.egā sikhānā koī ham se siikh jaa.e

dekh kar qātil ko bhar laa.e ḳharāsh-e-dil meñ ḳhuuñ

sach to ye hai muskurānā koī ham se siikh jaa.e

tiir o paikāñ dil meñ jitne the diye ham ne nikāl

apne hāthoñ ghar luTānā koī ham se siikh jaa.e

kah do qāsid se ki jaa.e kuchh bahāne se vahāñ

gar nahīñ aatā bahānā koī ham se siikh jaa.e

ḳhat meñ likhvā kar unheñ bhejā to matlā dard kā

dard-e-dil apnā jatānā koī ham se siikh jaa.e

jab kahā martā huuñ vo bole mirā sar kaaT kar

jhuuT ko sach kar dikhānā koī ham se siikh jaa.e

vaañ hile abrū yahāñ pherī gale par ham ne teġh

baat kā iimā se paanā koī ham se siikh jaa.e

teġh to ochhī paḌī thī gir paḌe ham aap se

dil ko qātil ke baḌhānā koī ham se siikh jaa.e

zaḳhm ko siite haiñ sab par sozan-e-almās se

chaak siine ke silānā koī ham se siikh jaa.e

pūchhe mullā se jise karnā ho sajda sahv kā

sīkhe gar apnā bhulānā koī ham se siikh jaa.e

kyā huā ai 'zauq' haiñ juuñ mardumuk ham rū-siyāh

lekin āñkhoñ meñ samānā koī ham se siikh jaa.e

chupke chupke gham ka khana koi hum se sikh jae

ji hi ji mein tilmilana koi hum se sikh jae

abr kya aansu bahana koi hum se sikh jae

barq kya hai tilmilana koi hum se sikh jae

zikr-e-sham-e-husn lana koi hum se sikh jae

un ko dar-parda jalana koi hum se sikh jae

jhuT-muT afyun khana koi hum se sikh jae

un ko kaf la kar Darana koi hum se sikh jae

sun ke aamad un ki az-KHud-rafta ho jate hain hum

peshwa lene ko jaana koi hum se sikh jae

hum ne awwal hi kaha tha tu karega hum ko qatl

tewaron ka taD jaana koi hum se sikh jae

lutf uThana hai agar manzur us ke naz ka

pahle us ka naz uThana koi hum se sikh jae

jo sikhaya apni qismat ne wagarna us ko ghair

kya sikhaega sikhana koi hum se sikh jae

dekh kar qatil ko bhar lae KHarash-e-dil mein KHun

sach to ye hai muskurana koi hum se sikh jae

tir o paikan dil mein jitne the diye hum ne nikal

apne hathon ghar luTana koi hum se sikh jae

kah do qasid se ki jae kuchh bahane se wahan

gar nahin aata bahana koi hum se sikh jae

KHat mein likhwa kar unhen bheja to matla dard ka

dard-e-dil apna jatana koi hum se sikh jae

jab kaha marta hun wo bole mera sar kaT kar

jhuT ko sach kar dikhana koi hum se sikh jae

wan hile abru yahan pheri gale par hum ne tegh

baat ka ima se pana koi hum se sikh jae

tegh to ochhi paDi thi gir paDe hum aap se

dil ko qatil ke baDhana koi hum se sikh jae

zaKHm ko site hain sab par sozan-e-almas se

chaak sine ke silana koi hum se sikh jae

puchhe mulla se jise karna ho sajda sahw ka

sikhe gar apna bhulana koi hum se sikh jae

kya hua ai 'zauq' hain jun mardumuk hum ru-siyah

lekin aankhon mein samana koi hum se sikh jae