chura raha hai KHazane na aaj kal se mere

churā rahā hai ḳhazāne na aaj kal se mire

ye duzd-e-umr ta.āqub meñ hai azal se mire

ye kaj-adā mujhe achchhe dinoñ se jāntī hai

baḌe marāsim-e-dairīna haiñ ġhazal se mire

dikhā dikhā ke na.e manzaroñ kā ḳhālī-pan

daraḳht haath milāte haiñ dast-e-shal se mire

vo aañkh so ga.ī vo chāñdnī bhī ruuTh ga.ī

mukālme na mukammal hue kañval se mire

chhabelī le ga.ī yāroñ ko kyoñ pas-e-mahtāb

gile ġhazab ke haiñ doshīza-e-ajal se mire

chura raha hai KHazane na aaj kal se mere

ye duzd-e-umr taaqub mein hai azal se mere

ye kaj-ada mujhe achchhe dinon se jaanti hai

baDe marasim-e-dairina hain ghazal se mere

dikha dikha ke nae manzaron ka KHali-pan

daraKHt hath milate hain dast-e-shal se mere

wo aankh so gai wo chandni bhi ruTh gai

mukalme na mukammal hue kanwal se mere

chhabeli le gai yaron ko kyon pas-e-mahtab

gile ghazab ke hain doshiza-e-ajal se mere