chust kamar ka kya sabab tang qaba ki wajh kya

chust kamar kā kyā sabab tañg qabā kī vaj.h kyā

ham to haiñ aap sar-ba-kaf ham se adā kī vaj.h kyā

ḳhaak meñ jo milā ho ḳhud us pe sitam se kyā husūl

husn kī ye sarisht hai varna jafā kī vaj.h kyā

apnī haiñ jaisī ḳhaslateñ mujh pe bhī hai gumāñ vahī

ye nahīñ gar sabab to phir tark-e-vafā kī vaj.h kyā

mashrab-e-ishq meñ dilā kufr hai yaar se riyā

jab ki butoñ kā dhyān ho zikr-e-ḳhudā kī vaj.h kyā

aaj kiye hazār qatl kal kiye aur bhī sivā

shaġhl ye jis nigah kā ho us ko hayā kī vaj.h kyā

rūh-o-jasad kā sābiqa kitne dinoñ kā hai bhalā

donoñ kī jins do hai jab un meñ vafā kī vaj.h kyā

sadma-e-dard-o-ranj-o-ġham tūl-e-firāq kā alam

haiñ ye havādisāt chand un kī baqā kī vaj.h kyā

sun leñ jo vo zahe-nasīb gar na suneñ to kyā gila

hai ye unhīñ se guftugū tark-e-duā kī vaj.h kyā

mālik-e-dil haiñ jab vahī jab hai unhīñ kā iḳhtiyār

murtakib-e-gunāh kyuuñ jurm-o-ḳhatā kī vaj.h kyā

ro.e haiñ ham zarūr 'shād' tab to hai lab pe āh-e-sard

meñh na baras gayā to phir ThanDī havā kī vaj.h kyā

chust kamar ka kya sabab tang qaba ki wajh kya

hum to hain aap sar-ba-kaf hum se ada ki wajh kya

KHak mein jo mila ho KHud us pe sitam se kya husul

husn ki ye sarisht hai warna jafa ki wajh kya

apni hain jaisi KHaslaten mujh pe bhi hai guman wahi

ye nahin gar sabab to phir tark-e-wafa ki wajh kya

mashrab-e-ishq mein dila kufr hai yar se riya

jab ki buton ka dhyan ho zikr-e-KHuda ki wajh kya

aaj kiye hazar qatl kal kiye aur bhi siwa

shaghl ye jis nigah ka ho us ko haya ki wajh kya

ruh-o-jasad ka sabiqa kitne dinon ka hai bhala

donon ki jins do hai jab un mein wafa ki wajh kya

sadma-e-dard-o-ranj-o-gham tul-e-firaq ka alam

hain ye hawadisat chand un ki baqa ki wajh kya

sun len jo wo zahe-nasib gar na sunen to kya gila

hai ye unhin se guftugu tark-e-dua ki wajh kya

malik-e-dil hain jab wahi jab hai unhin ka iKHtiyar

murtakib-e-gunah kyun jurm-o-KHata ki wajh kya

roe hain hum zarur 'shad' tab to hai lab pe aah-e-sard

meinh na baras gaya to phir ThanDi hawa ki wajh kya