chur sadmon se ho baid nahin

chuur sadmoñ se ho ba.iid nahīñ

ābgīna hai dil hadīd nahīñ

mai-kashī kyā kare bhalā zāhid

maġhfirat kī use umiid nahīñ

chār-sū hai añdherā āñkhoñ meñ

chaar din se jo us kī diid nahīñ

mere aage milī vo ġhairoñ se

hai moharram mujhe ye iid nahīñ

qatl aalam hai tere abrū par

koī talvār se shahīd nahīñ

apne dil se mujhe irādat hai

maiñ kisī piir kā murīd nahīñ

dil kisī se lage to kyā chhūTe

koī is qufl kī kalīd nahīñ

dekh le mar ke saḳhtī-e-sakrāt

sadma-e-hijr se shadīd nahīñ

vasl-e-jānāñ hai seġha-e-tohmat

ki mujarrad haiñ ham mazīd nahīñ

ishq kyā dard hai ḳhudāvandā

koī dārū-davā mufīd nahīñ

nahno-aqrab dalīl hai ai 'bahr'

yaar nazdīk hai ba.iid nahīñ

chur sadmon se ho baid nahin

aabgina hai dil hadid nahin

mai-kashi kya kare bhala zahid

maghfirat ki use umid nahin

chaar-su hai andhera aankhon mein

chaar din se jo us ki did nahin

mere aage mili wo ghairon se

hai moharram mujhe ye id nahin

qatl aalam hai tere abru par

koi talwar se shahid nahin

apne dil se mujhe iradat hai

main kisi pir ka murid nahin

dil kisi se lage to kya chhuTe

koi is qufl ki kalid nahin

dekh le mar ke saKHti-e-sakraat

sadma-e-hijr se shadid nahin

wasl-e-jaanan hai segha-e-tohmat

ki mujarrad hain hum mazid nahin

ishq kya dard hai KHudawanda

koi daru-dawa mufid nahin

nahno-aqrab dalil hai ai 'bahr'

yar nazdik hai baid nahin