dad bhi fitna-e-bedad bhi qatil ki taraf

daad bhī fitna-e-bedād bhī qātil kī taraf

be-gunāhī ke sivā kaun thā bismil kī taraf

manzileñ raah meñ thiiñ naqsh-e-qadam kī sūrat

ham ne muḌ kar bhī na dekhā kisī manzil kī taraf

maqtal-e-nāz se guzre to guzarne vaale

phuul kuchh pheñk ga.e dāman-e-qātil kī taraf

jhilmilāte nahīñ be-vaj.h to mahfil ke charāġh

ik nazar dekh to lo sāhab-e-mahfil kī taraf

kitnī be-kaif haiñ sāhil kī fazā.eñ yā rab

koī tūfān kā ruḳh moḌ de sāhil kī taraf

yaad aatā hai vo andāz-e-tajāhul ai dost

baat auroñ se magar rū-e-suḳhan dil kī taraf

zikr aayā thā hayāt-e-abadī kā 'tābāñ'

log kyuuñ takne lage kūcha-e-qātil kī taraf

dad bhi fitna-e-bedad bhi qatil ki taraf

be-gunahi ke siwa kaun tha bismil ki taraf

manzilen rah mein thin naqsh-e-qadam ki surat

hum ne muD kar bhi na dekha kisi manzil ki taraf

maqtal-e-naz se guzre to guzarne wale

phul kuchh phenk gae daman-e-qatil ki taraf

jhilmilate nahin be-wajh to mahfil ke charagh

ek nazar dekh to lo sahab-e-mahfil ki taraf

kitni be-kaif hain sahil ki fazaen ya rab

koi tufan ka ruKH moD de sahil ki taraf

yaad aata hai wo andaz-e-tajahul ai dost

baat auron se magar ru-e-suKHan dil ki taraf

zikr aaya tha hayat-e-abadi ka 'taban'

log kyun takne lage kucha-e-qatil ki taraf