dad milti nazar-e-ahl-e-nazar se pahle

daad miltī nazar-e-ahl-e-nazar se pahle

maut aatī jo kahīñ dil ko jigar se pahle

tasfiya karte na hañgām-e-sahar se pahle

pūchh lete kisī māyūs nazar se pahle

merā marnā tumheñ ho jā.egā ḳhud hī ma.alūm

dil taḌap uTThegā siine meñ ḳhabar se pahle

tum to kahte the ki maiñ dard kā qaa.il hī nahīñ

kaun chīḳhā mire nāloñ ke asar se pahle

naam jis chiiz kā hai maut jahāñ meñ mash.hūr

vāqi.a ye to huā dard-e-jigar se pahle

aaj kī raat to kuchh ....aur ḳhabar detī hai

ho munāsib to chale aanā sahar se pahle

ek bijlī sī mirī āñkhoñ ke andar kaundī

aur irāda jo huā azm-e-safar se pahle

roī majbūriyoñ par chāragaroñ kī qismat

mar gayā aap kā bīmār sahar se pahle

maiñ bhī samjhā huuñ tire naqsh-e-qadam kā matlab

maiñ bhī guzrā thā isī rāhguzar se pahle

dad milti nazar-e-ahl-e-nazar se pahle

maut aati jo kahin dil ko jigar se pahle

tasfiya karte na hangam-e-sahar se pahle

puchh lete kisi mayus nazar se pahle

mera marna tumhein ho jaega KHud hi malum

dil taDap uTThega sine mein KHabar se pahle

tum to kahte the ki main dard ka qail hi nahin

kaun chiKHa mere nalon ke asar se pahle

nam jis chiz ka hai maut jahan mein mashhur

waqia ye to hua dard-e-jigar se pahle

aaj ki raat to kuchh aur KHabar deti hai

ho munasib to chale aana sahar se pahle

ek bijli si meri aankhon ke andar kaundi

aur irada jo hua azm-e-safar se pahle

roi majburiyon par chaaragaron ki qismat

mar gaya aap ka bimar sahar se pahle

main bhi samjha hun tere naqsh-e-qadam ka matlab

main bhi guzra tha isi rahguzar se pahle