داد و تحسین و ستائش نہ پذیرائی کو

داد و تحسین و ستائش نہ پذیرائی کو

کوئی آیا نہ مری حوصلہ افزائی کو

دیکھ تو لوں میں ذرا پیکر رعنائی کو

چھین لینا تو بھلے بعد میں بینائی کو

جو بھی روشن تھے بجھا کر سب امیدوں کے چراغ

سو گئے آج بھی ہم اوڑھ کے تنہائی کو

روز ہی ظلم ستم اور بڑھا دیتا ہے

ناپتا ہے وہ مرے ضبط کی گہرائی کو

میرے سینہ کے سبھی زخم ادھڑ جاتے ہیں

یاد کرتا ہوں کبھی جو تری انگڑائی کو

دوست بھی اب صف دشمن میں نظر آتے ہیں

جب سے ہونٹھوں پہ سجا رکھا ہے سچائی کو

لفظوں کے پھولوں میں مفہوم کی خوشبو ہی نہیں

کیسے کہہ دوں میں غزل قافیہ پیمائی کو

اس نے ہی میرا بنایا ہے تماشہ اے انیسؔ

مان بیٹھا تھا فدائی میں تماشائی کو