dad-o-tahsin-o-sataish na pazirai ko

dād-o-tahsīn-o-satā.ish na pazīrā.ī ko

koī aayā na mirī hausla-afzā.ī ko

dekh to luuñ maiñ zarā paikar-e-rānā.ī ko

chhīn lenā tū bhale baa'd meñ bīnā.ī ko

jo bhī raushan the bujhā kar sab umīdoñ ke charāġh

so ga.e aaj bhī ham oḌh ke tanhā.ī ko

roz hī zulm sitam aur baḌhā detā hai

nāptā hai vo mire zabt kī gahrā.ī ko

mere siine ke sabhī zaḳhm udhaḌ jaate haiñ

yaad kartā huuñ kabhī jo tirī añgḌā.ī ko

dost bhī ab saf-e-dushman meñ nazar aate haiñ

jab se hoñThoñ pe sajā rakkhā hai sachchā.ī ko

lafzoñ ke phūloñ meñ mafhūm kī ḳhushbū hī nahīñ

kaise kah duuñ maiñ ġhazal qāfiya-paimā.ī ko

us ne hī merā banāyā hai tamāsha ai 'anīs'

maan baiThā thā fidā.ī maiñ tamāshā.ī ko

dad-o-tahsin-o-sataish na pazirai ko

koi aaya na meri hausla-afzai ko

dekh to lun main zara paikar-e-ranai ko

chhin lena tu bhale ba'd mein binai ko

jo bhi raushan the bujha kar sab umidon ke charagh

so gae aaj bhi hum oDh ke tanhai ko

roz hi zulm sitam aur baDha deta hai

napta hai wo mere zabt ki gahrai ko

mere sine ke sabhi zaKHm udhaD jate hain

yaad karta hun kabhi jo teri angDai ko

dost bhi ab saf-e-dushman mein nazar aate hain

jab se honThon pe saja rakkha hai sachchai ko

lafzon ke phulon mein mafhum ki KHushbu hi nahin

kaise kah dun main ghazal qafiya-paimai ko

us ne hi mera banaya hai tamasha ai 'anis'

man baiTha tha fidai main tamashai ko