daera sa ajib tha ghar mein

dā.era sā ajiib thā ghar meñ

ghuum jaatī rahī sadā ghar meñ

ek meñ thā ḳhudā kā kuchh sāmāñ

dūsrā taaq thā mirā ghar meñ

kuchh kitābeñ haiñ aur kuchh yādeñ

in charāġhoñ se hai ziyā ghar meñ

ghar ne vo din bhī dekh rakkhe haiñ

kuchh nahīñ thā mire sivā ghar meñ

us ko manzil bhī ham samajhte haiñ

aa rahā ho jo rāsta ghar meñ

jab bujhā.ī koī lagī ham ne

har taraf se dhuāñ uThā ghar meñ

umr bhar ḳhud ko zer-e-pā rakkhā

aa.ina thā bichhā huā ghar meñ

bag meñ us ne bhar liye va.ade

ek maiñ ne bhī rakh liyā ghar meñ

jis kī ḳhātir ye dil uThā ghar se

us ne phir lā ke rakh diyā ghar meñ

bhā.iyoñ meñ fasād lāzim thā

taḳht thā aur taaj thā ghar meñ

daera sa ajib tha ghar mein

ghum jati rahi sada ghar mein

ek mein tha KHuda ka kuchh saman

dusra taq tha mera ghar mein

kuchh kitaben hain aur kuchh yaaden

in charaghon se hai ziya ghar mein

ghar ne wo din bhi dekh rakkhe hain

kuchh nahin tha mere siwa ghar mein

us ko manzil bhi hum samajhte hain

aa raha ho jo rasta ghar mein

jab bujhai koi lagi hum ne

har taraf se dhuan uTha ghar mein

umr bhar KHud ko zer-e-pa rakkha

aaina tha bichha hua ghar mein

bag mein us ne bhar liye wade

ek main ne bhi rakh liya ghar mein

jis ki KHatir ye dil uTha ghar se

us ne phir la ke rakh diya ghar mein

bhaiyon mein fasad lazim tha

taKHt tha aur taj tha ghar mein