dagh baiana husn ka na hua

daaġh bai.āna husn kā na huā

khoTe dāmoñ mo.āmla na huā

dil mukaddar rahā safā na huā

faiz ā.īna-rūoñ kā na huā

kuchh na kaam aa.e daaġh kī buuTī

qalb tāñbā rahā tilā na huā

dard-mandān-e-ḳhāl kahte haiñ

goliyāñ khā.īñ fā.eda na huā

dil ḳhayāloñ se pā.emāl rahā

sabza-e-rah-guzar harā na huā

aa.e fasl-e-chaman ki iid aa.e

ġhunche chaTke ki shādiyāna huā

har kisī zulf meñ rahā uljhā

dām-e-ulfat se dil rihā na huā

na khaTakte kisī ke āñkhoñ meñ

ye ġhubār apnā tūtiyā na huā

mere aage vo baiThe ġhair ke paas

paas merā unheñ zarā na huā

dil ne aise uThā.e rañj-o-ta.ab

phir mohabbat kā hausla na huā

jab kisī kī nazar paḌe ruḳh par

ḳhāl-e-mushkīñ siyāh daana huā

dekhī kaifiyyat-e-bahār-o-ḳhizāñ

maiñ do-rañgī se āshnā na huā

dil shagufta huā na phūloñ se

koī kāñTā girah-kushā na huā

ghar banā kar yahāñ ye tañg aayā

uqda-e-ḳhātir āshiyāna huā

rashk kā hai ma.aal be-rañgī

sabza pis kar kabhī hinā na huā

'bahr' dil soch kar use denā

ḳhud-ġharaz āshnā huā na huā

dagh baiana husn ka na hua

khoTe damon moamla na hua

dil mukaddar raha safa na hua

faiz aaina-ruon ka na hua

kuchh na kaam aae dagh ki buTi

qalb tanba raha tila na hua

dard-mandan-e-KHal kahte hain

goliyan khain faeda na hua

dil KHayalon se paemal raha

sabza-e-rah-guzar hara na hua

aae fasl-e-chaman ki id aae

ghunche chaTke ki shadiyana hua

har kisi zulf mein raha uljha

dam-e-ulfat se dil riha na hua

na khaTakte kisi ke aankhon mein

ye ghubar apna tutiya na hua

mere aage wo baiThe ghair ke pas

pas mera unhen zara na hua

dil ne aise uThae ranj-o-tab

phir mohabbat ka hausla na hua

jab kisi ki nazar paDe ruKH par

KHal-e-mushkin siyah dana hua

dekhi kaifiyyat-e-bahaar-o-KHizan

main do-rangi se aashna na hua

dil shagufta hua na phulon se

koi kanTa girah-kusha na hua

ghar bana kar yahan ye tang aaya

uqda-e-KHatir aashiyana hua

rashk ka hai maal be-rangi

sabza pis kar kabhi hina na hua

'bahr' dil soch kar use dena

KHud-gharaz aashna hua na hua