dagh dil chamka to gham paida hua

daaġh dil chamkā to ġham paidā huā

ye añdherā sub.h-dam paidā huā

maiñ huuñ vo gum-gashta-e-rāh-e-talab

merī hastī se adam paidā huā

ho ga.ī har ek beshī meñ kamī

jab ḳhayāl-e-besh-o-kam paidā huā

un ke aane kī ḳhushī kyā chiiz thī

is ḳhushī se aur ġham paidā huā

mai-kade meñ shaiḳh bhī aayā agar

gardan-e-mīnā meñ ḳham paidā huā

husn meñ taḳhlīq kā jauhar bhī hai

us ke ''maiñ'' kahne se ''ham'' paidā huā

yaad un kī yuuñ rafīq-e-rāh thī

har qadam par ham-qadam paidā huā

kyā kaheñ ham is adā-e-ḳhās ko

har karam se ik sitam paidā huā

marg kā kuchh bhī na thā ai 'josh' ġham

un ke va.ade se ye ġham paidā huā

dagh dil chamka to gham paida hua

ye andhera subh-dam paida hua

main hun wo gum-gashta-e-rah-e-talab

meri hasti se adam paida hua

ho gai har ek beshi mein kami

jab KHayal-e-besh-o-kam paida hua

un ke aane ki KHushi kya chiz thi

is KHushi se aur gham paida hua

mai-kade mein shaiKH bhi aaya agar

gardan-e-mina mein KHam paida hua

husn mein taKHliq ka jauhar bhi hai

us ke main kahne se ham paida hua

yaad un ki yun rafiq-e-rah thi

har qadam par ham-qadam paida hua

kya kahen hum is ada-e-KHas ko

har karam se ek sitam paida hua

marg ka kuchh bhi na tha ai 'josh' gham

un ke wade se ye gham paida hua