داغ دل داغ جگر شمع فروزاں ہو گیا

داغ دل داغ جگر شمع فروزاں ہو گیا

ان کے آتے ہی مرے دل میں چراغاں ہو گیا

اے خیال یار تو دل میں جو مہماں ہو گیا

پھر دل ویراں مرا رشک گلستاں ہو گیا

تھی مرے دل کی امنگوں ہی سے دنیا کی بہار

دل پریشاں کیا ہوا عالم پریشاں ہو گیا

دیکھ سب زخم جگر اب بن گئے گلہائے تر

آ کہ یہ اجڑا خرابہ بھی گلستاں ہو گیا

یاس و نومیدی کی چھائی جب مرے دل کی گھٹا

مطلع امید کو سورج نمایاں ہو گیا

دم محبت کا بھرا کرتا تھا جو دل وصل میں

اب وہ شام ہجر آتے ہی پشیماں ہو گیا