داغ غم حیات فروزاں ہے ان دنوں

داغ غم حیات فروزاں ہے ان دنوں

روح بہار خار بداماں ہے ان دنوں

آزاد ہو کے جشن بہاراں منائیں کیا

یہ دل تو وقف زحمت زنداں ہے ان دنوں

کیا ہوگا غنچہ ہائے تمنا کا دیکھیے

گلچیں کی دسترس میں گلستاں ہے ان دنوں

دنیائے مہر و لطف و وفا خواب ہو گئی

انساں ستم رسیدۂ انساں ہے ان دنوں

چڑھنے لگا ہے دل پہ بھی تاریکیوں کا رنگ

مدھم سی اپنی شمع شبستاں ہے ان دنوں

لفظ سکون صرف کتابوں میں رہ گیا

ہر دم خیال گردش دوراں ہے ان دنوں

دل کا قرار چین نہ جینے کی آرزو

کشتی ہی نذر شورش طوفاں ہے ان دنوں

یاں آبروئے فکر سخن بھی گئی کلیمؔ

اب کیا بتائیں کون غزل خواں ہے ان دنوں