dagh-e-sina markaz-e-tanwir hai

dāġh-e-sīna markaz-e-tanvīr hai

dil kā chhālā chāñd kī tasvīr hai

zindagī kyā hai koī samjhā.e to

ḳhvāb hai yā ḳhvāb kī tā'bīr hai

chain se zindāñ meñ baiThe ab junūñ

paañv meñ chakkar nahīñ zanjīr hai

phūñk deñgī nafrateñ ghar aap kā

naam darvāze pe kyuuñ tahrīr hai

ghar kā ik naqsha banā letī hai roz

ye jo dil meñ hasrat-e-tā'mīr hai

ham amaañ paate the jis ke saa.e meñ

vo shajar ab dhuup kī tasvīr hai

kis ke vā'de par kareñ ham e'tibār

kis ke māthe pe vafā tahrīr hai

dagh-e-sina markaz-e-tanwir hai

dil ka chhaala chand ki taswir hai

zindagi kya hai koi samjhae to

KHwab hai ya KHwab ki ta'bir hai

chain se zindan mein baiThe ab junun

panw mein chakkar nahin zanjir hai

phunk dengi nafraten ghar aap ka

nam darwaze pe kyun tahrir hai

ghar ka ek naqsha bana leti hai roz

ye jo dil mein hasrat-e-ta'mir hai

hum aman pate the jis ke sae mein

wo shajar ab dhup ki taswir hai

kis ke wa'de par karen hum e'tibar

kis ke mathe pe wafa tahrir hai